Шымкенттің Әл-Фараби ауданында 9 айда белгіленбеген жерде саудамен айналысқан 1326 азамат анықталды.
Шымкент қаласы ІІД Әл-Фараби аудандық полиция бөлімінің қызметкерлері стихиялық сауда орындарында тұрақты түрде профилактикалық іс-шаралар жүргізуде.
Ағымдағы жылдың қаңтар-қыркүйек айлары аралығында ауданның учаскелік полиция қызметкерлері рейдтік жұмыс барысында Қазақстан Республикасы Әкімшілік құқық бұзушылық туралы кодексінің 204-бабы (Анықталмаған орындарда сауда жасау) бойынша 1326 әкімшілік хаттама толтырды.
Сонымен қатар, тәртіп сақшылары заңсыз сауда фактілерінің алдын алу және жолын кесу мақсатында саудагерлер арасында тұрақты түрде түсіндірме жұмыстарын жүргізеді.
Қазақстан Республикасы ӘҚБтК-нің 204-бабына сәйкес жергілікті атқарушы орган белгілеген орындардан тыс жерде сауда жасау ескерту жасауға немесе 5 АЕК мөлшерінде айыппұл салуға әкеп соғады. Ал бұл құқық бұзушылықты бір жыл ішінде қайталап жасау 10 АЕК мөлшерінде айыппұл салуға әкеп соғады.
