Жаңа оқу жылында Шымкентте 20 жаңа мектеп ашылып, мектептерге қосымша екі ғимарат салынды, апатты мектептер жойылды, үш ауысымда оқитын мектептер саны 14-тен 9-ға қысқарды.
Жыл соңына дейін тағы 4 жаңа мектеп ашылады деп күтілуде.
Елбасының тапсырмасы бойынша Шымкентте білім беру инфрақұрылымы қарқынды дамып келеді, – деді Шымкент қаласының басшысы Мұрат Әйтенов «Тұран» шағын ауданында бой көтерген жаңа мектепті аралау кезінде.
«Тәуелсіздігіміздің 30 жылдығы қарсаңында жаңа оқу жылы басталғалы тұр. Тәуелсіздік жылдарында Шымкент қаласы білім беру саласында үлкен жетістіктерге жетті. Осыдан 30 жыл бұрын қалада 69 мың оқушы оқитын небәрі 72 мектеп болса, қазір 233 мыңнан астам оқушы оқитын 203 мектеп бар. Қала мектептерінде жаңа оқу жылын 233 879 оқушы бастады. Бұл өткен жылмен салыстырғанда 8 мыңға артық. Оның ішінде 25 мың оқушы алғаш рет мектеп табалдырығын аттады.
2025 жылға қарай 72 мектеп салу жоспарда бар. 24 мектеп биылғы жылдың еншісінде. Оның 20-сы оқу жылының басында ашылды. Сонымен қатар, екі мектепке қосымша ғимарат салынды. Жыл соңына дейін тағы төрт мектептің құрылысы аяқталады деп жоспарлануда. Жаңа оқу жылын апатты мектептерсіз бастаймыз. 2023 жылға қарай қаладағы үш ауысымды мектептер мәселесі толығымен шешілетінін атап өткім келеді», - деді Мұрат Айтенов құттықтау сөзінде.
Қала әкімі балалардың қауіпсіздігін қамтамасыз ету үшін мектептерде бейнебақылау жүйесі, турникеттер, дабыл түймелері орнатылғанын, мектептердің материалдық-техникалық базасын нығайту бойынша жүйелі жұмыстар жүргізіліп жатқанын атап өтті. Сонымен қатар, жаңа модификация бойынша құрал-жабдықтармен қамтамасыз ету мақсатында 263 аудиторияға 178 интерактивті тақта орнату жұмыстары жүргізілді. Нәтижесінде жаңа модификацияланған құрал-жабдықтармен жабдықталған пән кабинеттерінің үлесі 65%-ға жетті. Бұл жұмыс жалғасын табады.
Айта кету керек, эпидемиологиялық жағдайға байланысты барлық санитарлық шараларды сақтай отырып, алғашқы қоңырау тек бірінші сынып оқушылары үшін соғылды. Қалған сыныптардағы оқушыларға санитарлық талаптарды сақтай отырып сынып сағаты ұйымдастырылды.
