Шымкентте мемлекетке 3 миллиард теңге залал келтірген екі қылмыстық топтың іс-әрекетінің жолы кесілді.
Агенттіктің Шымкент қаласы бойынша аумақтық департаменті жалған шот-фактуралар берумен айналысқан екі қылмыстық топқа қатысты сотқа дейінгі тергеу амалдарын аяқтады.
Тергеу мәліметінше, 8 адамнан тұратын қылмыстық топтың бірі 2018-2020 жылдар аралығында контрагент кәсіпорындарға материалдық сыйақы алу үшін жалған есеп құжаттарын жазып берген.
Аталған ұйымдасқан қылмыстық топтың 16 кәсіпкерлік субъектілеріне қатыстылығы анықталып, олардың құжаттары мен мөрлері қылмыстық схеманың негізгі ұйымдастырушысының үйінен табылды.
Екінші қылмыстық топ 21 фирманың атынан тауарларды жеткізу және қызмет көрсету бойынша осындай ойдан шығарылған мәмілелерді жасаған. Сонымен қатар, шарттар бойынша жұмыс көлемі іс жүзінде аяқталмаған. Соның салдарынан мемлекетке 3,1 млрд теңге салық төленбеген. Қазіргі таңда қылмыстық істер сотта қаралуда.
