Солтүстік Қазақстан облысында жеке тұрғын үй құрылысына тегін жер учаскелерін беру жобасы жүзеге асырылуда, деп хабарлайды СҚО әкімдігінің сайты.
«Қалалықтар үшін көптен күткен оқиға! «Солнечный 2» шағын ауданында жеке тұрғын үй құрылысына 1,5 мың тегін жер телімі дайындалды. Барлығы 2000 жер учаскесі берілмек. Жер учаскелеріне инженерлік инфрақұрылым тартылған: су, электр және жол. Шағын ауданда барлығы 105 км электр желісі, 54 қосалқы станса, 72 км су құбыры, 78 км жол салынды. Ықшам ауданда мектеп те салынады», — деп жазды СҚО әкімі Құмар Ақсақалов әлеуметтік желідегі парақшасында.
Сонымен қатар, «Южный» шағын ауданында тағы 1 мың тегін жер телімі беріледі. Қазір онда инфрақұрылымдық жұмыстар аяқталуда.
Осылайша, облыс орталығында қала тұрғындарына жеке үй салу үшін 3 мың тегін жер телімі беріледі. Қазір Петропавлда 16,5 мың адам жеке тұрғын үй құрылысына кезекте тұр.
«Тегін жер телімдері кезек бойынша беріледі. Бұл процесс ашық болуы тиіс. Ол үшін арнайы комиссия құрылып, оның құрамына қоғам белсенділері, журналистер, депутаттар мен қоғамдық кеңес өкілдері кіреді», — деді өңір басшысы.
