Әкім Мұрат Әйтеновпен кездесуге 11 азамат келді. Негізінен тұрғындарды баспана, әлеуметтік қызмет, инфрақұрылым мәселелері толғандырады.
Осылайша, Қаратау ауданына қарасты Бозарық елдімекенінің тұрғыны Алмасхан Еспаев Таскен ықшамауданы тұрғындары өз қаражаты есебінен тұрып жатқан су желілерін коммуналдық меншікке беруге көмек көрсетуді сұрады.
Бұл азаматтың өтінішін қала әкімі жеке бақылауына алып, тиісті жұмыстарды ұйымдастыруды орынбасары Мәулен Айманбетовке тапсырды. Қазір жауапты ұйым сумен қамту схемасын жасап жатыр. Жүйенің техникалық құжаттамасы дайын болғаннан кейін жұмыс басталады.
«Нұрсәт» ықшамауданының тұрғыны, 5 жетім баланы тәрбиелеп отырған әже Қызайым Байғазиева тұрғын үй және әлеуметтік көмек көрсету мәселесін көтерді. Үлкен немересі 2015 жылы тұрғын үй кезегіне тіркелген. Ол сол баспананы тездетіп алуға ниетті екенін айтты. Арызданушыға мемлекеттік тұрғын үй қорынан тұрғын үй заң аясында кезектілік тәртібімен берілетіні түсіндірілді.
Абай ауданы, «Жайлау» ықшамауданының тұрғыны Әйгерім Орынбасарова 2018 жылдан бері баспана кезегінде тұрғанын айтып, баспана алуға көмек сұрайды. Қала әкімі мемлекеттік тұрғын үй қорынан тұрғын үйлер кезектілік тәртібімен берілетінін атап өтті. Биыл жетім және ата-анасының қамқорлығынсыз қалған балалар санатынан кезекте тұрғандарға 60 пәтер бөлу жоспарлануда. Қазірдің өзінде 25 пәтер пайдалануға берілді. Қалған 35 пәтер пайдалануға берілгеннен кейін азаматтарға беріледі.
Қала тұрғындары П.Тұрбеков, Г.Есмурзаева жер телімдері бойынша сұрақтар қойды. Қала басшысы тұрғындардың өтініштерін мұқият тыңдап, жер телімдерін заңдастыру бойынша туындаған барлық мәселелер заң талаптары аясында шешілетінін айтты.
