Мәдениет және спорт министрі Дәурен Абаев Ақмола облысына жұмыс сапары аясында халықпен кездесу өткізіп, азаматтардың сұрақтарына жауап берді. Сонымен қатар министр азаматтарды мәдениет, спорт, туризм және архив ісі саласында жүргізіліп жатқан жұмыстар туралы хабардар етті. Бұл туралы ведомствоның баспасөз қызметі мәлімдеді.
Айта кету керек, биыл бүкіл ел бойынша 114 жаңа спорт нысаны салынып, 21 ірі спорт нысаны қайта жаңғыртылды.
«Біз ондаған миллиард теңге тұратын дене шынықтыру-сауықтыру кешендерін салу тәжірибесінен біртіндеп бас тартамыз. Мұндай кешендерде пайдалы спорттық жүктемені көтермейтін көптеген бос жатқан аумақтар бар. Үлкен атриумдар, дәліздер, паркингтер, акт залдары және т.б. Модульдік спорт нысандарын салу әлдеқайда тиімді.», - деді Дәурен Абаев.
Министр биылғы жылы сабақтан тыс спорттық сабақтарды жүргізгені үшін педагогтердің еңбекақысы 100% - ға көтерілгенін хабарлады. Дене шынықтыру және спорт саласындағы мамандандырылған мектептер мен колледждер қызметкерлеріне – 2020 жылдан бастап 2023 жылға дейін лауазымдық еңбекақысы 100%-ға көтеріледі. Допингке қарсы зертхананың, Ұлттық допингке қарсы орталық қызметкерлеріне, спортты дамыту дирекциясының жаттықтырушыларына - лауазымдық еңбекақысы да 100% - көтеріледі. Сондай-ақ, чемпиондар мен олардың жаттықтырушыларын өмір бойы қамтамасыз ету мөлшері 4 есеге артты. Сонымен қатар, 2024 жылға қарай спорт төрешілерінің лауазымдық еңбекақысы 100% - ға дейін көтеріледі.
Одан әрі Дәурен Абаев туризм мәселелеріне тоқталды. Оның айтуынша, жыл соңына дейін ішкі туристер саны 8 миллион адамнан асады.
«Салыстыру үшін, 2020 жылы ел бойынша барлығы 4,5 миллион турист тіркелген. Әрине елімізге келетін шетелдік азаматтар санының өсуі байқалады. Жыл соңына қарай олардың саны 700 мыңнан асады. Бұл өткен жылмен салыстырғанда 2 есе көп. Біз 25 елмен 80 бағыт бойынша халықаралық әуе қатынасын қалпына келтірдік. 74 ел үшін визасыз режим жаңартылды, құрлық шекаралары ашылды», - деді ол.
Оның айтуынша, Ақмола облысы еліміздегі туризм өсімінің негізгі драйверлерінің бірі. Биылғы жылы өңірде туризм саласында жалпы сомасы 17,6 млрд теңгені құрайтын 75-ке жуық жоба іске асырылып отыр.
2022 жылдың бірінші жартыжылдығында инвестициялық жобаларды іске асыру нәтижесіне сай 364 жұмыс орны құрылды. Ал жыл соңына дейін 904 жұмыс орнын құру жоспарланған.
