Бұл туралы Шымкент қалалық жұмыспен қамту және әлеуметтік қорғау басқармасының басшысы Балмаржан Нарбекова тікелей эфирде айтты.
Оның айтуынша, биылғы жылы «Еңбек» мемлекеттік бағдарламасы бойынша 33 500 адамды жұмыспен қамту жоспарланса, соның 31 486-сы бағдарламаға қазірдің өзінде қатысуда. Қысқа мерзімді кәсіптік оқуға 2500 адам жіберілді, оның ішінде 2112 адам тұрақты жұмысқа орналасты. Бос жұмыс орындарына – 19 609, әлеуметтік жұмыс орындарына – 200, жастар тәжірибесіне – 2578, ақылы қоғамдық жұмыстарға – 3058 азамат жіберілді.
Тікелей эфирде 50-ден астам азамат өз сауалдарын қойды. Сұрақтардың басым бөлігі атаулы әлеуметтік көмек алуға, жастар тәжірибесіне жұмысқа орналасуға қатысты. Балмаржан Нарбекова ісін жаңа бастаған кәсіпкерлерге арналған арнайы мемлекеттік бағдарламалардың тиімділігін жан-жақты түсіндірді. Сондай-ақ ол әлеуметтік көмек мемлекет тарапынан уақытша көрсетілетінін, кәмелетке толған отбасы мүшелерінің жұмыспен қамту орталығы арқылы жұмысқа орналасуға мүмкіндігі бар екенін баса айтты.
