Бүгінгі таңда Атырау облысында 30 отын жеткізушіден 96 автогаз құю станциясы (АГҚС) бар.
"Энергетика министрлігінің хатына сәйкес, Атырау облысына тұтынушылар үшін ішкі нарыққа Атырау мұнай өңдеу зауытынан (АМӨЗ) 5 744 тонна газ жеткізіледі. Алайда, АМӨЗ-де жоспарлы жөндеу жұмыстарын жүргізуге байланысты қазіргі уақытта газ жеткізу 35% - ға қысқарды және зауыттан жеткізілетін газ мөлшері - 3 785,161 тонна", - деп хабарлайды Атырау облысының Өңірлік коммуникациялар қызметі.
Айта кету керек, жөндеу жұмыстарын жүргізу кезінде АМӨЗ тәулігіне 90 тонна газ жеткізсе, 6 қарашадан бастап бұл көрсеткіш 60 тонна болады. Бұл АГҚС-да газ тапшылығына себеп болды. «АМӨЗ» ЖШС-нің мәліметіне сәйкес, қараша айының аяғына қарай, яғни 19-25 аралығыңда болжамды газ өндірісі тәулігіне 800 тоннаны құрайтын болады.
Газ жеткізу жағдайын тұрақтандыру үшін жергілікті атқарушы органдар Энергетика министрлігімен бірлесіп өңірге көршілес Ақтөбе облысынан жеткізу бойынша ұйымдастыру жұмыстарын жүргізіп жатыр. «Gas Processing» компаниясынан 400 тонна және «Қазақойл Ақтөбе» компаниясынан 700 тонна газ жеткізу жоспарлануда.
