Шымкент қалалық энергетика және инфрақұрылымды дамыту басқармасының басшысы Б.Булатбеков электр қуатының жиі өшіп қалуының негізгі себептеріне кеңінен тоқталып, қаланы сапалы электр қуатымен және ауыз сумен қамтамасыз ету барысы туралы баяндады. Тікелей эфирде әлеуметтік желі арқылы тұрғындардың сауалдарына жауап берді.
Жамбыл ГРЭС-інен электр қуатының жиі өшіп қалу мәселесін шешу үшін қосымша 70 МВт электр қуатын алуға келісім-шарт жасалды.
"Ағымдағы жылы қала тұрғындарын сапалы электр энергиясымен қамтамасыз ету мақсатында 16 елдімекенде (барлығы 20 нысан) құрылыс жұмыстары басталды. Бүгінгі таңда Қарабастау елдімекенінде 100-ге жуық абонент электр жарығымен қамтылған. Құрылыс жұмыстары жүргізілуде. 1-М-1 қосалқы стансасының құрылысы аяқталды, іске қосуға дайындық жүріп жатыр. Нәтижесінде Асар-2 елдімекенінің тұрғындары сапалы электр энергиясымен қамтамасыз етіледі», - деді Булатбеков.
Жалпы, жыл соңына дейін 7 елдімекенде (Достық, Жалын, Ақжар, Ынтымақ-2, Айкөл, Игілік, Түйелсіздікке 20 жыл) құрылыс жұмыстары аяқталып, 21,3 мыңға жуық тұрғын сапалы электр энергиясымен қамтамасыз етіледі.
Сонымен қатар, басқарма басшысының айтуынша, қала тұрғындарын сапалы ауыз сумен қамтамасыз ету мақсатында 14 нысанның құрылысы жүргізілуде. Қазіргі таңда Тұран, Ынтымақ-2, Ақтас-2 және Сәуле (276 орам), Жаңаталап, Асар-2 елді мекендерінде құрылыс жұмыстары аяқталып, тұрғындарды су құбырына қосу жұмыстары басталды.
Солтүстiк Саяжай және Нұртас елдімекендерiнде су құбыры толығымен аяқталды, қазiргi таңда су құбырлары сынақтан өткiзiлiп, есептегiштер орнатылуда. Бұл жұмыстар қараша айының соңына дейін аяқталып, аталған елді мекендердің тұрғындары сапалы ауыз сумен қамтылады. 2021 жылға арналған жоспарға сәйкес қала толығымен ауыз сумен қамтамасыз етіледі.
