Тікелей эфирде Шымкент қаласы Абай ауданының әкімі Бұхарбай Парманов өңір тұрғындарының бірқатар сауалдарына жауап берді. Абайлықтар жол құрылысына, аулаларды абаттандыру мен жарықтандыруға, инженерлік коммуникацияларды тартуға ерекше қызығушылық танытты.
Эфир барысында аудан әкімі 2014 жылы аудан аумағына 10 елдімекен қосылғанын айтты. Дегенмен, қала әкімі Мұрат Әйтеновтің тапсырмасымен шалғай елдімекендерді инфрақұрылыммен қамтамасыз ету мәселесі 2020 жылдан бастап жүзеге асырылуда. Қысқа мерзімде 461 млн теңгеге жобалық-сметалық құжаттама әзірленіп, қазіргі таңда құрылыс жұмыстары жүргізілуде
Ауданның 34 елдімекені сапалы ауыз сумен қамтамасыз етілсе, 10 елдімекен құдық ауыз суын пайдаланады. Жаңаталап, Игілік, Тәуелсіздікке 20 жыл, Көкбұлақ, Қызылжар елді мекендеріндегі құрылыс жұмыстары 2020 жылы басталып, биыл пайдалануға берілді. Сондай-ақ, жыл соңына дейін «Ынтымақ-2», «Батыс», «Нұршуақ» шағын аудандары сапалы сумен қамтамасыз етілсе, «Құрсай», «Арғымақ» шағынаудандарындағы құрылыс жұмыстары келер жылы да жалғасын таппақ.
Электр қуатына қатысты да сауалдар қойылды. Аудан әкімі 8 елдімекен жеке трансформаторлардан электр жарығымен қамтылғанын және ағымдағы жылы мемлекеттік электр қуатымен қамтамасыз ету үшін 3,4 млрд теңгеге құрылыс жұмыстары жүргізіліп жатқанын атап өтті.
Сондай-ақ аудандағы 11 елдімекен қатты отынды пайдаланады. Биылғы жылы Алтынтөбе, Батыс, Арғымақ, Ақтас, Ақтас-2, Ақжар, Көкбұлақ елді мекендерін көгілдір отынмен қамту бойынша құрылыс жұмыстары жүргізілуде. «Ынтымақ-2» шағын ауданы, Нұршуақ елді мекенін газдандыруға жобалық-сметалық құжаттама әзірленуде. Ал Құрсай және Тәуелсіздікке 20 тұрғын алаптары бойынша 2022 жылға ЖСҚ әзірлеу жоспарланған.
Тікелей эфирде аудан әкімі тұрғындардың 40-қа жуық сауалына жауап берді. Сұрақтардың басым бөлігі көгілдір отын, су, жарық және қоғамдық көлікке қатысты.
