Дубай қаласында өткен «Шымкент қаласының күндері» аясында туристерді тарту және ішкі, сыртқы, медициналық туризмді дамыту бойынша бірлескен іс-шараларды жоспарлау мақсатында Шымкент қаласы әкімдігі мен «Nirvana Travel and. Tourism LLC», «New magic LifeStyle», «Unique Group Hotel's and Travel» және «Seside Investment Dubai» екіжақты меморандумдарға қол қойды.
Меморандум аясында бірлескен роуд-шоу ұйымдастыру, имидждік өнімдермен алмасу, көрмелерге, форумдарға, конференцияларға бірлесіп қатысу, бірлескен ынтымақтастықтың басқа да бағыттарын қолдау және ұйымдастыру туралы келісімдерге қол жеткізілді.
22-25 қараша аралығында Шымкент қаласының күндері өтеді. Жалпы, «EXPO Dubai 2020» халықаралық көрмесі сәуір айына дейін жалғасады. Мұнда 200-ге жуық елдің павильондары қойылған. Қазақстан павильонына күніне 3 мыңға жуық адам келеді.
Шараға Шымкент қаласы әкімінің бірінші орынбасары Шыңғыс Мұқан, қала әкімінің орынбасары Айбек Сәттібаев, Қазақстанның БАӘ-дегі елшісі Мадияр Меңілбеков, Шымкент қаласы мәслихатының хатшысы Б.Нарымбетов, бірқатар депутаттар, бір топ бизнес өкілдері қатысты.
