Сенатор Ақмарал Әлназарова Қазақстан Республикасы Парламентінің Сенаты мен Өзбекстан Республикасы Олий Мәжілісінің Сенаты арасындағы Ынтымақтастық жөніндегі комиссияның отырысында Қазақстан Арал өңірінде денсаулық сақтау жүйесін күшейту жөнінде бірқатар бастамалар мен шаралар қабылдап жатқанын хабарлады. Дегенмен, депутаттың айтуынша, Арал өңірі тұрғындарының денсаулық көрсеткіштері жақсарған жоқ.
«Өңірдегі денсаулық сақтау жүйесі жергілікті халықтың аурулығы, мүгедектік пен өлім-жітімінің көптігі бойынша аса күрделі сын-қатерлерге тап болып отыр. Арал өңіріндегі туу көрсеткіші соңғы 5 жылда 13,6%-ға төмендеді. Халықтың табиғи өсімі 12,4%-ға азайды. Өңірде тұратын жүкті әйелдердің денсаулық индексі республикалық көрсеткіштен 1,6 есе төмен. Сәбилер шетінеуінің көрсеткіші дәстүрлі түрде республикалық көрсеткіштен жоғары және азаймай отыр», - деді Ақмарал Әлназарова.
Депутат осыған байланысты экологиялық және климаттық дағдарыс жағдайында денсаулық сақтау саласындағы өңірлік қауіпсіздікті қамтамасыз ету жөніндегі бағдарлама дайындауды ұсынды.
«Бағдарламаны іске асыру және проблемаларды кешенді шешу үшін біз Қазақстан Республикасы мен Өзбекстан Республикасы парламентшілерінің өзара іс-қимылын одан әрі күшейтіп, бағдарламаны қаржыландыру көзін іздестіруіміз қажет. Бүгін Комиссияның үшінші отырысында біз Арал теңізі бассейнінің проблемаларын шешуде бұдан былайғы бірлескен күш-жігерді бастайтынымызға сенімдімін», - деді сенатор.
