Шымкентте алғашқы әскери дайындық курсынан өтіп жатқан механикаландырылған бригадаға шақырылғандар арасында «Ең зерек сарбаз» ойын-сауықтық-интеллектуалдық сайысы өтті, деп хабарлайды Elitar.kz Otyrar.kz сайтына сілтеме жасап.
5 қатысушыдан тұратын 4 команда өздерінің оқу-жаттығу взводтарын таныстырды. Олар бірнеше айналымдар барысында қазылар алқасы мен әріптестерінің мұқият бақылауымен өздерінің білімдерін, эрудициясын, күрделі сұрақтарға тез жауап табу қабілеттерін ортаға салды.
Жігіттер жалпы әскери жарғы, жауынгерлік, оқу-жаттығу және мемлекеттік-құқықтық дайындық тақырыптарында шеберлік сабақтарын көрсетті. Сайысқа қатысушылар әскери бөлімге келгеннен бері өткізілген сабақтардың барлығы толық меңгерілгенін, офицерлер мен сержанттардың күш-жігері толығымен ақталғанын өз жауаптары арқылы дәлелдеді.
Жас сарбаздардың оқу-жаттығу жиынының бастығы, подполковник Ринат Қалидолдин атап өткендей, әскери қызметшілердің бос уақытын ұйымдастырудағы шығармашылық көзқарас табысты және қауіпсіз қызметтің кепілі болып табылады, ал армия өміріне байланысты зияткерлік ойын сарбаздарға өздерінің жауынгерлік өмірін, күнделікті әрекеттерді басқа бұрыштан көруге көмектеседі.
Байқаулар арасында жас толықтырудың шығармашылық ұжымы концерттік нөмірлермен және музыкалық аспаптарда ойнаумен қуантты.
Айта кету керек, күзгі әскерге шақыру науқаны аясында Шымкент механикаландырылған бригадасына Атырау, Қостанай, Солтүстік Қазақстан облыстары мен Алматы қаласынан 130-дан астам сарбаз келген.
