Қазақстан Республикасы Тәуелсіздігінің 30 жылдығы қарсаңында, сондай-ақ бұқаралық спортты насихаттау мақсатында Шымкентте «Шымкент марафоны – 2021» қалалық спорттық шарасы өтті.
Үздіктердің қатарында гарнизонның әскери қызметшілері болды.
Мегаполисте бесінші жыл өтіп жатқан марафонда қатысушылар 5, 10, 21 және 42 шақырымдық қашықтықта бақ сынады. Жақсы нәтиже көрсеткен үздік қатысушылардың қатарында «Оңтүстік» өңірлік қолбасшылығының әскери қызметшілері бар.
Атап айтсақ, 40 пен 49 жас аралығындағы бес шақырымдық қашықтықты механикаландырылған бригада мотоатқыштар батальонының әскери қызметшісі, аға сержант Нұрлан Керімбеков екінші болып бағындырды.
– Спорт – денсаулық кепілі! Әрқашан қызметтен бос уақытымызда бүкіл отбасы спортпен айналысады және шынықтырады. Осындай жарыстарда өнер көрсеткенде жолдасым мен балаларым қасымда болып, мені қолдап отырады. Отан отбасынан басталады, отбасым үшін қызметте үлгілі әке, үлгілі сарбаз болуға тырысамын, – дейді аға сержант Нұрлан Керімбеков.
Ал, сол бригаданың штаб батальонының келісімшарты бойынша тағы бір әскери қызметші қатардағы жауынгер Соғырбай Сәуірбек 21 шақырымдық қашықтықта 1 сағат 25 минут нәтиже көрсетіп, өз жас санатында үздік ондыққа енді.
