Премьер-Министр Асқар Маминнің төрағалығымен өткен Үкімет отырысында еліміздің 10 айдағы әлеуметтік-экономикалық дамуының қорытындылары, республикалық халық санағы және республикалық бюджеттің атқарылуы талқыланды.
10 айдың әлеуметтік-экономикалық даму көрсеткіштерін жариялаған Ұлттық экономика министрі Әсет Ерғалиев отандық және шетелдік инвестицияларды тартудың оң өсімін атап өтті. Республикада ағымдағы жылдың он айында өндірістік емес салаларға инвестицияның өсімі 14,0%-ға өсті.
Сондай-ақ ол Шымкенттің инвестиция тарту бойынша өңірлер арасында жетекші орын алатынын атап өтті. Қалада өткен жылдың сәйкес кезеңімен салыстырғанда инвестиция тарту көрсеткіші 41,2 пайызға артқан.
Өткен он айдың қорытындысы бойынша құрылыс саласында да оң өсім сақталды. Шымкентте бұл көрсеткіш өткен жылмен салыстырғанда 11,8 пайызға артқан.
Есепті кезеңде республикада 11,6 млн шаршы метр тұрғын үй пайдалануға берілді. Өткен жылмен салыстырғанда көрсеткіш 23,7 пайызға өскен.
А.Ерғалиев Алматы, Жамбыл облысы, Нұр-Сұлтан және Шымкент қалаларында 7 негізгі макроэкономикалық көрсеткіш бойынша оң өсім байқалғанын атап өтті.
