Шымкент қаласының әкімі Мұрат Әйтенов "Тұран" шағынауданындағы №79 мектептің оқушыларын жаңа оқу жылымен құттықтады.
Барша ұстаздар мен оқушыларды Білім күнімен және жаңа мектептің ашылуымен құттықтаған қала басшысы бірінші сынып оқушыларына сәттілік тілеп, әліппені табыстады.
Мектеп 897 оқушыны қабылдайды. Қала басшысы ықшамаудан ақсақалдарымен бірге жаңа мектепті, спорт залын, Абай шығармашылығын оқыту сыныбын, шахмат сыныбын, еңбек, тігін, асхананы аралап көрді. Мұрат Айтенов құрылыстың сапасы мен дизайнына жоғары баға берді. Мектеп директорына оқу кезеңінде санитарлық шаралардың сақталуын қамтамасыз ету тапсырылды.
Бұл оқу орны 1200 орынға есептелген, заманауи құрал-жабдықтармен жабдықталған. Жұмыс екі ауысымда жүргізілетін мектепте 44 оқу кабинеті бар. Оның ішінде: жаңа үлгідегі 8 мультимедиялық лингофондық кабинет, 85 компьютермен және 3 интерактивті тақтамен жабдықталған 3 информатика кабинеті. Сондай-ақ, 4 шеберхана, салауатты өмір салтын қалыптастыруға арналған спорт залы және балалардың денсаулығын қадағалайтын екі фельдшерлік пункт бар.
Қала әкімі балалардың қауіпсіздігін қамтамасыз ету үшін мектептерде бейнебақылау жүйесі, турникеттер, дабыл түймелері орнатылғанын, мектептердің материалдық-техникалық базасын нығайту бойынша жүйелі жұмыстар жүргізіліп жатқанын атап өтті. Сонымен қатар, жаңа модификация бойынша құрал-жабдықтармен қамтамасыз ету мақсатында 263 оқу кабинеті, 178 интерактивті тақта орнату жұмыстары жүргізілді. Нәтижесінде жаңа модификацияланған жабдықтармен жабдықталған пән кабинеттерінің үлесі 65%-ға жетті. Бұл жұмыс жалғасын табады.
«Биылғы жаңа оқу жылы Қазақстан Республикасы Тәуелсіздігінің 30 жылдығы қарсаңында басталады. Тәуелсіздік жылдарында Шымкент қаласының білім саласы толағай табыстарға қол жеткізді. Осыдан 30 жыл бұрын қалада 69 мың оқушы оқитын 72 мектеп болса, қазір 233 мыңнан астам оқушы оқитын 203 мектеп бар. Биыл қала мектептері 233 879 оқушымен оқуды бастауды жоспарлап отыр. Бұл өткен жылмен салыстырғанда 8 мың студентке көп», - деп түйіндеді үшінші мегаполис басшысы.
Айта кету керек, эпидемиологиялық жағдайға байланысты барлық санитарлық шараларды сақтай отырып, алғашқы қоңырау тек бірінші сынып оқушылары үшін соғылды. Қалған сыныптардағы оқушыларға санитарлық талаптарды сақтай отырып, сынып сағаты ұйымдастырылды.
