Билет Польшадан келген қонаққа бұйырды
Дубайдағы EXPO 2020 халықаралық көрмесіндегі Қазақстан павильонында «Шымкент күндері» жалғасуда. Екінші күні туристер арасында оңтүстік мегаполиске билет ойнытылды. \«Шымкент күндері» аясында бір күнде Қазақстан павильонын 5 мыңға жуық адам тамашалады. Олардың арасында БАӘ, АҚШ және Германиядан келген инвесторлар бар. Қонақтар мен туристерге Шымкент қаласының инвестициялық ахуалы және оның мүмкіндіктері туралы айтылды.
Күні кеше ғана алғашқы инвестиция тартылды, келісімдер жасалды. Енді шетелдік инвесторлар делегациямен бірге оңтүстік мегаполисті аралап, толығырақ танысуды жоспарлап отыр.
Сондай-ақ Дубай мен Шымкент арасында туризмді дамыту туралы меморандумға қол қойылды. Меморандум аясында бірлескен роуд-шоу ұйымдастыру, имидждік өнімдермен алмасу, көрмелерге, форумдарға, конференцияларға бірлесіп қатысу, бірлескен ынтымақтастықтың басқа да бағыттарын қолдау және ұйымдастыру туралы келісімдерге қол жеткізілді.
Туристер арасында Шымкентке барып-келу және жатын орны төленген билет ойнатылды. Ол үшін еліміздің үшінші мегаполисі туралы викториналық сұрақтарға жауап беру қажет болды.
Ең толық және нақты жауаптарды поляк Адриан Пиотровски берді. Сөйтіп, сертификатпен марапатталды. Енді ол қалада үш күн болады – қонақтың ұшағы, тұруы мен тамағы толығымен төленеді.
«Мен қазақстандықтарды бұлай қарсы алады деп күтпеген едім, бұл өте қызықты болды. Мен алдымен сіздің кафеңізге бардым, сосын павильонға барамын деп шештім, міне, ұтыс ойнатылып жатыр, жеңемін деп тіпті ойламадым. Міне, енді мен Шымкентке сапарға дайындалып жатырмын», - деді Адриан Петровский.
Қазақстандық павильонның қонақтары ұлттық тағамдардың дәмін татып, Қазақстан тарихымен танысып, ұлттық билерді тамашалап, халық әндерін тыңдай алады.
