Шымкент пен Адана (Түркия) арасында достық қарым-қатынас орнатылды. Zoom онлайн платформасы арқылы келісімге қол қою рәсіміне Шымкент қаласының әкімі Мұрат Айтенов пен Адана муниципалитетінің басшысы Зейдан Қаралар қатысты.
Тараптар Шымкент пен Адана қалалары арасындағы сауда-экономикалық, өндірістік және мәдени-гуманитарлық қарым-қатынастардағы және туризм саласындағы серіктестікте екіжақты ынтымақтастықты нығайту бойынша ынтымақтастық туралы келісімге келді. Олар аймақтық билік үйлестіретін түрлі секторлардағы әріптестіктің перспективалық бағыттарын талқылады.
Шымкентте түрік кәсіпкерлерімен ынтымақтастықтың оң тәжірибесі бар. Түрік инвесторларымен бірге жеңіл өнеркәсіп, құрылыс индустриясы, азық-түлік өндірісі салаларында 55 миллион АҚШ долларынан астам сомаға 6 жоба жүзеге асырылды.
Қала әкімі Мұрат Әйтенов екіжақты келісім іскерлік байланыстарды орнатуға және қалаларымызды бірлесіп дамытуға үлкен серпін беретінін атап өтті.
Кездесу барысында Түркия Республикасының Қазақстан Республикасындағы Төтенше және Өкілетті Елшісі Уфук Экижи, Қазақстан Республикасының Түркия Республикасындағы Төтенше және Өкілетті Елшісі Абзал Сапарбекұлы да сөз сөйлеп, қол жеткізілген келісімдердің маңызды тұстарын атап өтті.
Шымкент қаласы әкімінің орынбасары Мақсұт Исахов модераторлық еткен жиынға Шымкент қалалық мәслихатының хатшысы Бахадыр Нарымбетов, Шымкент қалалық депутаттық корпусының өкілдері, Түркия Республикасының Шымкент қаласындағы құрметті консулы және Түркістан облысы Латифша Асанов, Ball - Textile компаниясының басшысы Огуз Дурру да қатысты.
Естеріңізге сала кетейік, Шымкент бұған дейін 9 бауырлас қалалармен келісімге қол қойған: Могилев (Беларусь), Стивенаж (Ұлыбритания), Ахарон (Грекия), Паттайя (Тайланд), Гроссето (Италия), Байин (Қытай), Худжанд (Тәжікстан), сондай-ақ түрік Измирі мен Эскишехир. Көлемі бойынша Адана Түркиядағы төртінші қала. Сонымен бірге Түркияның территориялық орналасуында алатын орны, экономикалық құрылымы Шымкентке өте ұқсас.
Қалаларымыздың құрылымдық ұқсастығы Шымкент пен Адана арасындағы екіжақты ынтымақтастық туралы меморандумға қол қою кезінде маңызды құрамдас бөлікке айналды.
