Биыл Шымкентте 976 жанұяны жалдамалы пәтермен қамту жоспарлануда, деп хабарлады қалалық ТКШ бөлімінің басшысы Азамат Рысжанов қалалық әкімдіктің парақшасында өткен тікелей эфирде.
Тұрғындардың сауалдарына жауап бере отырып, тұрғын үйге мұқтаж кезекте тұрғандарға мемлекеттік тұрғын үй қорынан жалдамалы пәтерлер белгіленген кезектілікпен берілетінін және кезектілігі толық автоматтандырылғанын айтты.
"Шымкент қаласы – тұрғын үй құрылысы қарқынды жүргізілген өңірлердің бірі. Биыл 976 отбасын жалдамалы пәтермен қамту жоспарлануда. Жұмыс істейтін жастарға жыл басында 300 пәтер берілсе, 382 пәтер кезек күттірмейді. Жыл соңына дейін қалған 294 отбасы жалға берілетін баспанаға ие болады", - деді Рысжанов.
Сондай-ақ ол «Шаңырақ» бағдарламасы бойынша жергілікті атқарушы органдардың тапсырысы бойынша 1728 пәтерлі 27 көпқабатты тұрғын үй кезең-кезеңімен жалға беріліп жатқанын айтты. Бүгінгі күні 17 үйге инфрақұрылым тартылып, иелеріне пәтер кілттері табыс етілді.
