Ақтөбе облысының әкімі Ералы Тоғжановтың төрағалығымен өткен жиында Ақтөбе қаласын дамытудың жаңа бас жоспары қаралды.
Жиынға еліміздің ең мықты жобалаушылары мен сәулетшілері, бірқатар мемлекеттік органдардың басшылары қатысты. «Урбостиль» ЖШС жобалық-қала құрылысы директоры Любовь Нысанбаева, Ақтөбе қаласының әкімі Асхат Шахаров баяндама жасады.
Бас жоспарда облыс орталығын дамытудың 2050 жылға дейінгі негізгі қағидатты бағыттары белгіленген. 2050 жылға қарай Ақтөбе Қазақстанның 950 мың адам тұратын ірі мегаполисі болады деп болжанып отыр.
«950 мың адам — есептеудің ең қарапайым әдісі бойынша шыққан көрсеткіш. Бас жоспарда белсенді өсіп келе жатқан қаланың барлық қажеттіліктері ескеріледі және тұрғындар үшін қолайлы жағдай жасауға мүмкіндік беріледі. Барлық мәліметтер мен есептеулер қалалық және облыстық қызметтермен келісілген. Қазіргі таңда бас жоспар мемлекеттік сараптамадан өтуде», - деді Любовь Нысанбаева.
Облыс әкімі талқыланып жатқан құжаттың және оны іске асырудың маңыздылығын алға тартты.
«Тез арада шешуді талап ететін негізгі мәселе – қолданыстағы газ тарату желілерінің жоғары жүктемесінен туындаған газ тапшылығын жою. Газ көлемі жеткіліксіз болса, қала дамымайды», - деп атап өтті Ералы Тоғжанов.
Осы мәселені шешу мақсатында қазіргі уақытта «Бұқара-Орал» магистральдық газ құбырынан бөлінетін газ құбырының үшінші желісін салу жөніндегі жобаны қаржыландыру мәселелері қаралуда.
Сондай-ақ, қаланы абаттандыруға қатысты мәселелер әлі де басымдыққа ие. Атап айтқанда, облыс басшысы қала әкімдігіне аумақтарды санитарлық тазарту, көшелерді жарықтандыру, қоғамдық көліктің аялдама павильондарын орнату және тағы да басқа іс-шараларды күшейтуді міндеттеді.
