Шымкентте үш магистральды су құбырының құрылысы аяқталуға жақын. Бұл туралы баспасөз туры барысында қалалық энергетика және инфрақұрылымды дамыту басқармасының басшысы Б.Болатбеков мәлім етті.
Жалпы ұзындығы 11,37 шақырымды құрайтын Көмешбұлақ нысанының құрылысы 2020 жылы басталған. Қазіргі таңда 8,3 шақырым құбыр тартылып, құрылыс жұмыстарының 85 пайызы орындалды. Нысанның құрылысын ағымдағы жылдың қараша айында аяқтау жоспарланған.
Сондай-ақ ағымдағы жылы ұзындығы 13,6 және 11,76 шақырымдық ауыз су құбырларының құрылысы аяқталып, жыл соңында пайдалануға беріледі деп күтілуде.
Бұл магистральдық су құбыры іске қосылғанда Асар-2, Достық, Солтүстік саяжай, Ынтымақ, Ынтымақ-2, Батыс, Қызылжар, Игілік, Жағаталап, Тәуелсіздікке 20 тұрғын алаптары сапалы ауыз сумен қамтамасыз етіледі.
Қазіргі таңда қала тұрғындарын сапалы ауыз сумен қамтамасыз ету мақсатында 14 нысан, 3 магистральді су тарту және 11 орамішілік жүйенің құрылысы жүргізілуде.
Биылғы жылы Тұран, Солтүстік саяжай, Ынтымақ-2, Батыс, Жағатұрлан, Асар-2, Ақтас, Жағаталап және Сәуле шағынаудандары сапалы ауызсумен қамтамасыз етілетін 9 елдімекенде су құбырының құрылысы аяқталады.
