Бұқаралық спортты дамыту мақсатында Шымкенттің барлық аудандарында ерекше спорт алаңдары салынуда. Соның бірі Әл-Фараби ауданындағы Майлықожа көшесіне орнатылды. Тұрғындар бұған дейін алаңқайда ойнау мүмкін емес болғанын айтады. Қазір жағдай өзгерді, бұл жерде фитнеспен айналысуға, волейбол, баскетбол және шағын футбол ойнауға болады.
Ауданы 288 шаршы метр учаскенің құрылысына 16 миллион теңгеге жуық қаражат жұмсалды. Демеуші - атақты меценат Серік Түлбасовтың қоры.
Жаңа балалар алаңқайының ашылуына қала әкімінің орынбасары Мақсұт Исахов қатысты.
«Шымкентте 115 алаңқай саламыз деп айттық, оның 14-і кәсіпкерлердің есебінен салынбақ. Серік Түлбасов атындағы қор уәде еткен 7-уінтұрғызды. Бұқаралық спорттың дамуына үлес қосып, өскелең ұрпақтың мүддесін қорғап жүрген жанашыр азаматтарға алғысымыз шексіз», – дейді Шымкент қаласы әкімінің орынбасары Мақсұт Исахов.
Айта кетейік, биыл Әл-Фараби ауданында тағы 25 алаңқай салынады. Оларды Қазақстан Тәуелсіздігінің 30 жылдығына орай желтоқсан айында пайдалануға беру жоспарлануда.
