"Шымкентте жасалған". «Көрме» орталығында шымкентік тауар өндірушілерінің көрмесі басталды. Көрме 17-19 қараша аралығында өтеді. Шараның басты мақсаты – жергілікті тауар өндірушілерді қолдау, оларды танымал ету және тауар нарығын кеңейту.
Көрме экспозициясында қаланың құрылыс индустриясы, машина жасау, мұнай химиясы, жеңіл өнеркәсіп, тамақ өндірісі, тоқыма өнеркәсібі, фармацевтика, ауыл шаруашылығы өнімдерін өңдеу және т.б. салаларымен айналысатын 100-ге жуық кәсіпорынның өнімдері қойылған.
Көрменің ашылу салтанатына Шымкент қаласының әкімі Мұрат Айтенов қатысып, жергілікті тауар өндірушілердің өнімдерімен танысып, кәсіпкерлерге сәттілік тіледі. Экономиканы әртараптандыру, өндірілетін тауарлардың номенклатурасы мен экспорт географиясын кеңейту нәтижесінде Шымкент елде де, Орталық Азияда да ірі өндіріс орталығына айналды.
«Мемлекет басшысы Қазақстан халқына Жолдауында 2025 жылға қарай өңдеу өнеркәсібінің экспортын 1,5 есеге, 24 миллиард долларға, еңбек өнімділігін 30 пайызға арттыруды тапсырды. Қаламыздағы өнеркәсіп көлемі жыл соңына дейін 711 миллиард теңгеден асады. Өңдеу өнеркәсібі өндірілген өнімнің 87 пайызын құрайды. 87 мыңнан астам шағын және орта бизнес субъектілерінің жалпы өңірлік өнімдегі үлесі 41,6 пайызға жетті. Жергілікті тауар өндірушілердің өнімдерін ілгерілету, салалық қауымдастықтармен, кәсіпкерлермен бірлесіп тауарларымызды өткізу нарығын кеңейту бағытында ауқымды жұмыстар жүргізілуде», - деді қала әкімі.
Шымкент ішкі нарықта белгілі бір тауарларды негізгі жеткізуші болып табылады. Цемент, мотор майлары, кілемдер, аяқ киім, тұрмыстық тауарлар, фармацевтика, азық-түлік өнімдерін өндірудің ішкі нарығы мен ішкі экспорттық әлеуетін арттырады. Ішкі нарықтың 23,4 пайызын жеңіл өнеркәсіп кәсіпорындары, 38,3 пайызын фармацевтика, 12,3 пайызын металл емес материалдар құрайды.
Қала экономикасын әртараптандыру, ауыл шаруашылығы өнімдерін терең өңдейтін кәсіпорындардың үлесін арттыру, шағын және орта бизнесті дамыту бағытында кешенді жұмыстар жүргізілуде.
Шымкент өнімдерінің көрмесі санитарлық талаптарды сақтай отырып өтуде. Барлық қатысушылардың мәртебесі Ashyq қолданбасы арқылы анықталады.
