22 тамызда Instagram-дағы "Elbasy_live public" желісінде қолымен жазылған хат жарияланды. Хаттан белгілі болғаны, оны Орынбаев гипербарикалық оттегімен емдеу орталығының емделушісі әйеліне жазған. Оның жазуынша, емдеу орталығындағылар оттегінің берілуін тоқтатпақшы екен. Жан таласқан емделуші оны «оттегі бар» мекемеге ауыстыруды сұрайды. Және «Мен енді шыдай алмаймын», - деп жазыпты.
Хабарламаның сипаттамасында бұл науқастың кейін қайтыс болғаны айтылады.
Қалалық денсаулық сақтау басқармасы бұл ақпаратты растамады, жоққа да шығармады.
Шымкент гипербарикалық оксигенация орталығының бас дәрігері Мадина Ермаханбетова орталықта оттегінің жеткілікті қоры бар екенін, оттегінің жетіспеушілігінен өлім -жітім болмағанын айтты. Алайда полицейлер бұл хат желіде пайда болғаннан кейін Қылмыстық кодекстің 317-бабы («Медицина немесе фармацевтика қызметкерінің кәсіби міндеттерін тиісінше орындамауы») бойынша қылмыстық іс қозғағандарын айтты.
