Шымкентте Қонаев даңғылы мен Рысқұлов көшесінің қиылысында көлік қозғалысы толығымен ашық. Естеріңізге сала кетейік, бұған дейін Рысқұлов көшесінің бойындағы жол айрығының ашық тоннелі мен айналма жолдың бір бөлігі пайдалануға берілген болатын. Енді жолдың екінші беті ашылып, көліктер жан-жаққа жүре бастады.
Жолдың ашылуына қатысқан Шымкент қаласының әкімі Мұрат Әйтеновтің айтуынша, жол айрығының көлік өткізу мүмкіндігі үш есеге артқан.
"Қалалықтарды осындай маңызды нысанның ашылуымен құттықтаймын. Егер бұрын бұл қиылыстан күніне 30 мың көлік өтетін болса, енді бұл көрсеткіш 90 мыңға жетеді", - деп атап өтті қала басшысы алдағы уақытта қалада жаңа құрылыс жұмыстары жүргізілетінін айтты. Сондай-ақ, Бәйдібек би даңғылы мен Арғынбеков көшесінің қиылысындағы жол айрығының құрлысы басталатынын тілге тиек етті.
Ал нысанның айналасын абаттандыру және жаяу жүргіншілер өткелін салу жоспарына сәйкес бұл аумаққа 320 түп ағаш отырғызылады.
Шымкент қаласы әкімінің жол құрылысы саласына жауапты орынбасары Мақсұт Исахов барлық жұмыстарды мерзімінде аяқтау әкімдіктің абыройы екенін атап өтті.
«Осыдан тура бір жыл бұрын біз қаламыз үшін ең үлкен және маңызды нысандардың бірі – Қонаев-Рысқұлов жол айрығының құрылысын бастадық. Енді міне, бір жылдан кейін қарқынды құрылыстың нәтижесінде Қонаев даңғылы мен Рысқұлов көшесінің бойындағы қозғалысты толығымен қалпына келтірдік. Олар барлық бағыттағы көлік қозғалысы үшін ашық.
Жалпы, мұндай жол айырықтарының құрылысы кем дегенде 3 жыл немесе 36 айға созылады.
PS: Бір кездері күмәнданып, дауда жеңіліс тапқандар мұны мойындайтынына сенімдімін», - деп жазды ол әлеуметтік желідегі парақшасында.
Дегенмен, жақын арада Шымкентте тағы бір маңызды жол нысанының құрылысы басталады. Ол 2021 жылдың желтоқсан айында басталады деп жоспарланған болатын. Бірақ, әкімнің айтуынша, Тәуелсіздік күні мен Жаңа жылды мерекелеуге байланысты бұл жұмыс 2022 жылдың 5 қаңтарына шегерілді.
Шымкент қаласының әкімдігі бізге болашақ жол нысаны үш деңгейден тұратынын айтты: эстакада, тоннель және үстіңгі қабат. Мұндай жол Шымкентте алғаш рет салынбақ. 2022 жылдың 5 қаңтары мен 1 тамызы аралығында тек Арғынбеков көшесі жабылады. Бұл уақытта Бәйдібек би даңғылында көлік қозғалысына шектеу қойылмайды. Ал келесі жылдың тамыз-қазан айларында барлық бағыттағы қозғалыс тоқтатылады. 2022 жылдың 1 қарашасында Арғынбеков көшесінде көлік қозғалысы толығымен қалпына келтірілсе, Бәйдібек би даңғылында 80 пайызға дейін қалпына келтіріледі. Нысанның құрылысы 2023 жылдың наурыз айында толығымен аяқталады деп күтілуде.
Әкімнің айтуынша, қаланың бас жоспарында бес жол айрығын салу көзделген. Бірақ бұл ретте көлік кептелісі мәселесі толығымен шешіледі деп айту қиын. Сондықтан алдағы уақытта қалада баламалы көлік желісін құру қажеттігін де атап өтті.
