«Нұр Отан» партиясының «Кедергіс келешек» жобасы аясында Сайрам қосалқы мектеп-интернатының ескі ғимараты толығымен сүрілді. Оның орнына заманауи талаптарға сай, жаңа ғимарат бой көтерді.
Бұл нысан бір кездері балалар үйі ретінде салынған. Кейін осында қосалқы мектеп-интернаты орналасып, бертін келе «Сайрам» қосалқы мектеп-интернат-колледжі» коммуналдық мемлекеттік мекемесі болып қайта құрылады.
Партияның баспасөз қызметі хабарлағандай, бүгінгі таңда колледжге жаңа ғимарат салу жұмыстары 95 пайызға орындалды. Сондай-ақ, мұнда білім ошағынан бөлек 100 орындық асхана, акт және спорт залы, тігін және ағаш өңдеу шеберханалары жұмыс істейтін болады. Жаңа ғимараттың ауданы 3,5 гектарды құрайды, жеке учаскесі мен жеміс ағаштары: алма, қара өрік, өрік өсетін бақшасы бар.
Ерекше қажеттіліктері бар балалар мектеп-интернат-колледжді бітіргеннен кейін таңдалған мамандықтардың бірі бойынша диплом алады. Бұл оқу орны Қазақстанда бірінші болып қосалқы мектеп-колледж мәртебесіне ие болды.
Нысан құрылысы «Нұр Отан» партиясының Шымкент қаласы бойынша сайлауалды бағдарламасындағы "Жол картасын" жүзеге асырудың кешенді жоспарына енгізілген.
Естеріңізге сала кетейік, «Өзгеріс жолы: баршаға лайықты өмір!» бағдарламасы аясында 2025 жылға дейін «Кедергіс келешек» партиялық жобасы бойынша республика бойынша 22 мың әлеуметтік инфрақұрылым нысандарын ерекше қажеттіліктері бар адамдарға бейімдеу жұмыстары жүргізілмек. Мүгедектерді жұмыспен қамту, психологиялық және заңгерлік көмек көрсету орталықтары ашылады, өздеріне лайықты жұмысты таңдауға ыңғайлы болу үшін ерекше қажеттіліктері бар тұлғаларға арналған мамандықтар атласы құрастырылды.
2025 жылға қарай жұмыс істейтін мүгедектердің үлесі 30%-ға дейін өседі.
Мүмкіндігі шектеулі балалар үшін кәмелеттік жасқа толған соң тұрғын үй кезегінің үздіксіздігі қамтамасыз етіледі.
2025 жылға қарай мұқтаж мүгедектер 100% техникалық құралдармен және оңалту қызметтерімен қамтамасыз етілмек.
