02 тамыз, 10:51
Еңбекші ауданының әкімі Досбол Есілбек Instagram желісіндегі @akimat_shymkent парақшасы арқылы тікелей эфирге шығып, өз ауданындағы инфрақұрылымды дамыту мәселелерінің қалай шешіліп жатқанын айтып берді.
Оның айтуынша, Шымкент қаласының Еңбекші ауданына қарасты 35 шағынаудан мен тұрғын үйлер ауыз сумен, электр энергиясымен, табиғи газбен, жол инфрақұрылымымен қамтамасыз етілген.
Бұл ретте ауыз сумен қамтамасыз ету 94,4%-ды құрайды, орталықтандырылған электр энергиясымен жабдықтау жыл соңына дейін 95,2%-ға дейін, табиғи газ – 86,4%-ға дейін жетеді.
«Сумен қамтамасыз етілмеген аудан тұрғындарының 5,6%- ы келесі жылы ауыз сумен қамтамасыз етіледі. Қазіргі уақытта «Жалын» тұрғын алабының 566 абонентін, «Жұлдыз» тұрғын алабындағы 484 жаңа ғимараттың абонентін, Қарабастау тұрғын алабындағы 750 жаңа ғимараттың абонентін электрмен жабдықтау бойынша жұмыстар жүргізілуде. Жалпы 1800 абонентті қамтамасыз ету жоспарлануда. Сондай-ақ, ағымдағы жылы Бадам 195 шағын ауданы 331 абонентіне газ құбыры шығарылды. Бүгінгі таңда халыққа газ жүйесін қосу жұмыстары жүргізілуде», - деді Е.Есілбек.
Тікелей эфир барысында аудан әкімі ағымдағы жылы 57 көшеде (58,9 км) жолдардың жағдайын жақсарту мақсатында орташа жөндеу жұмыстарын жүргізу жоспарланғанын, қазіргі уақытта 19 көшені асфальттау аяқталып, 38 көшеде құрылыс жұмыстары жүргізіліп жатқанын атап өтті.
Аудан тұрғындары әкімнің есебін тыңдап қана қоймай, елді мекендерді абаттандыру мәселелерін де талқылады.
