БАҚ өкілдеріне арналған брифингте қала әкімі Мұрат Қадырбек Арыс қаласы қалпына келтіріліп жатқанын, 181 үйдің жөндеуден өткенін айтты, деп хабарлайды Elitar.kz тілшісі.
Бүгінде қала 17 секторға бөлініп, зақымданған үйлердің шатырларын, терезелері мен қабырғаларын қалпына келтіру жұмыстары жүргізіліп жатыр. Сол секторларға бөлінген қызметкерлер ақау актілерін түзумен де айналысуда.
"1,5 мыңнан астам құрылысшы жұмылдырылған. 700-ден астам тұрғын үйге жөндеу жұмыстары жүргізіліп жатыр. Таңертеңгі мәліметтерге сәйкес, 181 үйдің ақаулары қалпына толығымен келтірілді. Бұл бағытта ары қарай жұмыстар жүргізіліп жатыр. Тұрғындардың қалыпты өмірге дағдылануы үшін жағдайлар жасалып жатыр",-деді қала әкімі.
Зардап шеккен үйлердің қатарында қала әкімінің де үйі бар. Бірақ ол баспанасын қалпына келтіруді мемлекет есебінен жүргізбейтінін кесіп айтты.
"Қала
бойынша 180 үй жөнделді, соның
ішінде менің үйім жоқ. Менің үйімнің
терезелері мен есіктері сынған. Әзірге
жөндеу жұмыстары басталған жоқ. Мен
өз үйімді өзім жөндеймін",-деді ол.
Десе де қазір көп балабақшалар жұмыс істеп тұрған жоқ. Мектептер қыркүйек айына дейін жөнделетін болады. Бүгінгі күні қала аумағында 6 мемлекеттік, 24 жекеменшік балабақша бар деген Мұрат Қадырбек осы балабақшалардың барлығының да түгелдей зақымданғанын айтты.
"Қалпына келтіру жұмыстары жүргізілуде. 10 күннің ішінде сол балабақшалардың жартысын қалыпқа келтіреміз деп жобалап отырмыз",- деді ол.
