Шымкенттегі 56 эвакуациялық пунктердегі арыстықтар таңғы сағат алтыдан бастап арнайы бөлінген автобустармен өз үйлеріне орала бастады.
Таңғы сағат 8-ге дейін 80-ге жуық тасымал көлігімен 5 жарым мыңға тарта адам жолға шыққан.
"Қазіргі уақыттарда Шымкент қаласындағы эвакуациялық пунктерде 10500 адам осы уақытқа дейін сол жерде болды. Енді сол азаматтар Арысқа жылжып жатыр. Арнайы тіркеліп, туыстарының үйінде тұрып жатқан адамдар Ақмешітке келіп, осындағы көліктерге отырып, Арысқа жөнелтіліп жатыр. Ол жаққа барғандағы тағам мәселесі шешілген. Ол жақтағы уақытша тұратын жатын жай да шешіліп жатыр",-дейді "Нұр Отан" патриясы Түркістан облыстық филиал төрағасының бірінші орынбасары Ұласбек Сәдібеков.
"Үлкен үмітпен кетіп барамыз. Үкімет бізге тек материалдық қана емес, моральдық тұрғыда да көмек көрсетсе дейміз. Өйткені балам жарылыс даусынан кекештеніп қалды. Оған да ем қажет болады",-деді жолға шыққан Арыс тұрғыны.
"Мұнда келгендегі мақсатымыз Арыс тұрғындарын арнайы, үлкен құрметпен шығарып салу болатын. Кеше осында қонып жатқан адамдармен сөйлестім. Кішкентай баладан еңкейген қарияға дейін бар екен. Шағым айтып жатқан жоқ. Біз діни қызметкер болған соң көркем әңгімелерімізді айтып, сабырлыққа шақыру басты мақсатымыз болды",-деді Бас мүфтидің орынбасары Есмахан Бауыржан.
