Мәдениет және спорт министрінің тапсырмасымен Арыстағы жарылыстан зардап шеккен тұрғындар мен әскерилерге көмек көрсетіп, қолдау білдіру үшін Алтынбек Қоразбаев бастаған бір топ өнер жұлдыздары Шымкентке келді.
Сахна жұлдыздарының қатарында Сәкен Майғазиев, Мөлдір Әуелбекова, Майра Ілиясова, Нұрлан Албан, Алмас Алтынбеков сынды әншілер бар.
Олар 16 млн қаражат жинап, жарылыстардан зардап шеккен арыстықтарға көмек ретінде аударды. Алдағы уақытта бұл сома өседі, дейді ұйымдастырушылар.
Алтынбек Қоразбаев зардап шеккен Арыс жұртына қолдау білдіріп, басу айтты.
"Бәрі жақсы болатынына кәміл сенеміз. Аман-есен болыңыздар. Сіздермен әлі талай жолығамыз. Концерт көресіздер",-деді әнші.
Эвакуациялық пункттерді аралап, арыстықтардың жанайқайын тыңдаған өнер жұлдыздары оны тиісті органдарға жеткізуге уәде берді.
Халықтың сүйікті әншісі Алтынбек Қоразбаев жиналғандарға сөз соңында қол жайып, бата беруді де ұмытқан жоқ.
