Шымкент қаласының әкімі Ғабидолла Әбдірахымов Арыстағы жарылыстарға қатысты БАҚ өкілдеріне брифинг берді, деп хабарлайды Elitar.kz тілшісі.
Шымкент қаласының әкімі "Көрме" орталығындағы қойманың тоналғаны туралы ақпараттың жалған екенін айтты.
«Бүгін көрме маңына көп адам жиналды. Мен олардың орталыққа кіріп, өзіне қажет су мен киімдерді алуға рұқсат бердім. Бүгін біреулер желіде тонау, жымқыру жайттары орын алып жатыр деп жалған ақпараттар таратты. Мұның бәрі жалған, дезинформация. Ешқандай ұрлық болған жоқ, болмайды да»,-деп сендірді шахар басшысы.
Қала әкімінің хабарлауынша, бүгінгі күнге дейін
Шымкент қаласына 500 мың литр су, 5 тонна
ұн, 250 келі шәй, 3 тоннадан астам тәттілер,
4 тоннадан астам макарон өнімдері, 5 мың
қораптан астам гигиеналық заттар келіп
түсті. Алматы қаласының өзі «Мен
алматылықпын» қорынан 10 тонна азық-түлік
жіберді. Қарағанды жүк ұшағымен азық-түлік
жіберген.
Қала әкімі қиын кезде қол ұшын созған әріптестеріне алғыс білдірді.
"Көрме" орталығындағы аталған жүктер Ынтымақ шағынауданындағы сауда-логистикалық орталыққа ауыстырылған.
«Біз басында «Көрме» орталығында уақытша қойма ұйымдастырған едік. Ол жерде кезекшілік қойылған. Кеше түнде біз барлық тауарды сауда-логистикалық орталығына ауыстырдық. Өйткені ол жерде сақтауға жағдай жасалған. Азық-түліктер тоңазытқыштарда. Көрмеде бірнеше қорап су қалды. Сондай-ақ қала тұрғындары алып келген киімдер қалды",-деп түсіндірді әкім.
Айта кетейік, кәсіпкерлер Қайрат Молдасейітов, Болатбек Алиев, Әбдірашид Омаров әрқайсысы Шымкент қаласында ашылған арнайы қорға 10 млн теңгеден ақша бөлді. Қалған кәсіпкерлер де өз мүмкіндіктеріне қарай ақша бөліп жатыр. Әкімдік те бір күндік жалақысын аударды. Бұл шамамен 7 млн теңге.
Фото: Береке Сейітжаппар
