Бұл туралы Түркістан облысы бойынша соттар әкімшісінің басшысы Орынбасар Лештаев айтты, деп хабарлайды Elitar.kz тілшісі.
Арыстағы жарылыстардан зақымданған сот ғимараты асардың көмегімен 3 күнде қалпына келтіріліп, апта басында пайдалануға берілді. Айта кетейік, ғимаратқа жарылыстардан 2 млн теңге көлемінде зақым келген. Яғни, шатырдың жартысына жуығы қираған, терезелердің сексен пайызы сынған, есіктер толқынның соққысынан сынып, жарамсыз күйге түскен. Жөндеу жұмыстарына мемлекеттен бір тиын жұмсалған жоқ дейді Түркістан облысы бойынша соттар әкімшісінің басшысы Орынбасар Лештаев.
«Түркістандық соттар, жомарт азаматтар хабарласып, «Біздер мүмкін
болса жәрдем берейік, себебі сот жүйесін
тоқтатуға болмайды. Ертең тіршілік
басталғанда, түрлі даулар тууы мүмкін.
Сондықтан сот жүйесін қалпына келтіру
керек»,-деді. Мақсатымыз мемлекетке
алақан жаймай, өз күшімізбен бірлесіп,
болашақ жастарға ұлттық жанашырлық
қасиетімізді сақтап қалғанымызды,
ұйымшылдығымызды көрсетейік деп шатыры,
есік-терезесі қираған сот ғимаратымызды асарлатып толық жөндеуден өткіздік»,-деді ол.
Сондай-ақ, жомарт жандар ғимаратты қалпына келтіріп
қана қоймай, арыстық сот қызметкерлеріне
түгелдей азық-түлік жеткізіп, гуманитарлық
көмек көрсеткен.
"Осы қайырымдылық шараларының басы-қасында болған "Ақ жол" серіктестігінің директоры Сабыржан Атаев. Ол өз есебінен 2 млн теңгедей қаржы жұмсап, ғимараттың қалпына келуіне үлес қосты, сот қызметкерлерінің отбасыларына 25 қап ұн мен, азық-түлік таратты",-деп атап өтті Орынбасар Лештаев.
Одан өзге Орынбасар Лештаев жарылыстар кезінде сот ғимаратын тастап кетпей, өз қызметтік міндеттерін адал атқарған күзет қызметкерлерінің есімдерін ерекше атап өтті. Солардың бірі полиция аға сержанты Айдос Дербісов қауіпке қарамай сот құжаттары мен істерін қолды болып кетуден сақтап қалды, жарылыс кезінде адамдарды дер кезінде ғимарат ішіне кіргізіп, құтқарып қалды.
"Күзет қызметінде істеп жатқаныма 11 жыл болды. 24 маусым күні ауысымда болдым. Бәріміз де жарылыс кезінде постты тастап кетпей, орнымызда болдық. Жарылыс кезінде ең алдымен далада қашып келе жатқан адамдарды снаряд түспесін деп ішке кіргізуге әрекет жасадым. Нақты санын білмеймін. Бірақ ғимаратқа оннан аса адамды кіргіздім. Сосын оларды көшеде кетіп бара жатқан бос машиналарға кезек-кезегімен салып жіберіп отырдық. Қорқыныш болса да, ең алдымен ойымызда адамдарды құтқарып қалу болды",-деді мамандандырылған күзет басқармасының қызметкері, полиция аға сержанты Айдос Дербісов.
