Рохинджа мұсылман жасақшылары өткен жылдың тамыз айында көптеген бейбіт үнді азаматтарды өлтірген. Бұл туралы Amnesty International ұйымы өздері жүргізген зерттеудің нәтижесі бойынша мәлім етті деп хабарлайды
Мәліметтерге сәйкес, Arsa деп аталатын исламдық қарулы ұйым жаппай қырып-жою мақсатында шабуыл ұйымдастырып, жүзге жуық үндіні өлтірген. Аталған топ мұндай әрекет жасағанын мойындаудан бас тартты.
Оқиға Мьянма қарулы күштеріне шабуыл кезінде болған. Үкіметтік күштер де көптеген зорлық-зомбылық жасағаны үшін айыпталып отыр.
Былтырғы тамыздан бері 700 000-ға жуық рохинджа тұратын жерлерін тастап қашқан болатын. Қақтығыс кезінде ел тұрғындарының басым бөлігін құрайтын буддистер мен үнді азаматтары да басқа жақтарға қоныс аударуға мәжбүр болды.
Amnesty ұйымы жасаған зерттеулер кезінде рохинджа тұратын Ракхайн штатының солтүстік елді мекендерінде Arsa ұйымы мұсылман емес халықты жаппай қырғаны анықталды. Ескере кететін нәрсе, бұл туралы Бангладешке бас сауғалаған рохинджа босқындар айтқан.
Құжатта Arsa жасақшыларының 26 тамыз күні үнділер тұратын ауылға қалай шабуыл жасағаны сипатталады. «Ақылға сыйымсыз, қатыгез акт кезінде Arsa мүшелері үнді еркектері, әйелдері және балаларын ұстап, азаптаған, одан соң бәрін ауылдың сыртына апарып қырып салған» дейді зерттеушілер.
Осы оқиғадан аман қалған адамдар туыстарын қалай өлтіргенін өз көздерімен көріп, олардың шыңғырған дауысын естігендерін айтады.
«Еркектерді бауыздады. Олардың қолында пышақ, күрек және темір сымдар болды. Біз бұталардың арасында тығылып отырып көрдік... Нағашы ағам, әкем, бауырым – бәрін өлтірді» дейді бір әйел.
Arsa мүшелері 20 ер адам, 10 әйел, 23 баланы (олардың 14-інің жасы сегізден төмен) өлтірді деп айыпталып отыр.
Amnesty аталған ауылдың төрт шұңқырға көмілген 45 тұрғынының денесі табылғанын айтады.
