Қазақстан Республикасының Қаржы министрі Ерұлан Жамаубаев бюджеттен бөлінген қаржыны толық игермеген министрліктер мен әкімдіктерді атады, деп хабарлайды Elitar.kz Kazpravda.kz сайтына сілтеме жасап.
«Республикалық бюджет бойынша 14,5 триллион теңге көлемінде шығыстар жасалды. Орындалмағаны 295 млрд теңгені құрады, оның 17 млрд теңгесі – үнемдеу. Игерілмеген – 278 млрд теңге», – деді Ерұлан Жамаубаев.
Оның айтуынша, игерілмейтіндердің ең көп мөлшері Индустрия және инфрақұрылымдық даму, Ішкі істер, Төтенше жағдайлар және Оқу-ағарту министрліктерінде қалыптасты.
Жамаубаевтың айтуынша, игерілмеудің негізгі себептері: қазынашылықтың ақпараттық жүйелеріндегі техникалық ақаулар, конкурстық рәсімдердің ұзаққа созылуы, орындалған жұмыс актілерінің, шот-фактуралардың кеш ұсынылуы, келісім-шарттар мен қосымша келісімдерді жасау рәсімдерінің ұзаққа созылуы.
Оның айтуынша, жергілікті бюджеттердің шығыстары 8,1 трлн. теңгені құрады.
«Орындалмаған – 520 млрд теңге. Биыл өңірлерге 3,3 трлн нысаналы трансферттер қарастырылған. 1 қарашадағы жағдай бойынша оларға 2,6 трлн. теңге бөлінді. Оның 94,1 пайызы игерілді. Орындалмаған – 150 млрд теңге, оның ішінде үнемдеу – 16 млрд теңге, игерілмеген – 134 млрд теңге. Ең үлкен қаржы игерілмеуі Астанада, сондай-ақ Маңғыстау, Батыс Қазақстан және Ақтөбе облыстарында байқалды», - деді Қаржы министрлігінің басшысы.
Жобалық-сметалық құжаттаманың түзетілмеуі, орындалған жұмыстардың актілерінің уақтылы ұсынылмауы, ұзақ мерзімді конкурстық рәсімдер, қазынашылық органдарына төлеуге шот-фактуралардың уақытылы ұсынылмауы қаржының уақтылы игерілмеуінің негізгі себептері болып табылады.
