Шығыс Қазақстан облысының Риддер қаласында суық ауа райында мыңдаған отбасы жылусыз отыр. Жылу маусымы басталысымен жергілікті жылу электр орталығының тозығы жеткен қазандықтары бірінен соң бірі істен шығуда. Әкімшілік жағдай біртіндеп тұрақталып келе жатқанын айтады. Құр уәдеден шаршаған тұрғындар президентке шағымданды, леп хабарлайды Азаттық.
Қарашаның 10-ы күні Риддер қаласының әкімі Дмитрий Горковой жергілікті жылу электр орталығының жоғары қысымды қазандығын өшіретінін хабарлады. Қазандық бір күн бұрын болған апаттан кейін іске қосылған.
9 қарашада Риддер билігі жергілікті ЖЭО-да ақауы бар екі қазандық қайта іске қосылғанын және су температурасы қалыпты деңгейге жақындағанын хабарлады.
Қазан айының басынан бері Риддердегі жылу электр орталығының қазандықтары бірінен соң бірі істен шығып, мыңдаған адам жылусыз қалды. Өткен сенбіде техногендік төтенше жағдай жарияланды.
Риддерліктер бұл көріністің жылдан жылға қайталанып жатқанын, жергілікті билік мәселені шеше алмай отырғанын, сондықтан тұрғындар ел басшылығына жүгінуге мәжбүр екенін айтады.
"Біз, Шығыс Қазақстан облысындағы Риддер қаласының тұрғындары, қаламызда жергілікті билік көтере алмайтын төтенше жағдайдың орын алуына байланысты Сізге өтініш білдіреміз". Қазақстан Президенті Қасым-Жомарт Тоқаевқа және басқа да мемлекеттік органдарға үндеу осылай басталады.
7 қарашада басталған онлайн петицияға 2300-ден астам қол жиналды. Үндеуде балалардың, қарттардың, созылмалы дертке шалдыққандардың жылусыз суық үйлерде отырғаны айтылған. Авторлар президенттен «жағдайды бақылауға алуды» сұрайды.
