Түркістан облысының Арыс ауданында полицейлер малының жоғалғанын білмеген тұрғынның малдарын тез арада тауып берді. Бұл туралы Түркістан облыстық поилция департаментінің баспасөз қызметі хабарлады.
Мал ұрлығының түнгі жедел-алдын алу мен ескерту шаралары аясында Арыс-Шардара тас жолының бойында Арыс АПБ-нің полиция аға сержанты, патрульді полицияның командирі Бекжан Мамақов екі әріптесімен бірге мал артып алған «Газель» автокөлігін тоқтатады. Автокөлікті тексеру кезінде оның жүргізушісі мен екі жолаушысы артып алған ірі қара малдың ешбір құжатын көрсете алмаған. Белгілі болғандай, олар 5 сиырдың қараусыз жүргенін пайдаланып, бос жайылымнан жымқырған. Соңында, тәртіп сақшылары малының жоғалғанын байқамаған жергілікті тұрғынға малдарын тапсырды.
Тергеушілер 3 күдіктіге қатысты ҚР ҚК-нің 188-бабы «ұрлық» бойынша сотқа дейінгі тергеу амалдарын жүргізіп, жәбірленушінің ұрыларды кешіргенінен кейін істі өндірістен тоқтатқан.
