Оқиға Түркістан облысына қарасты Қазығұрт ауданында орын алған, деп хабарлайды облыстық Полиция департаментіне сілтеме жасап Elitar.kz.
Қазығұрт аудандық полиция бөлімшесіне Ордабасы ауданы тұрғынының арызы келіп түскен. Шағымданушы өз арызында марқұм болған туысының жаназасына қатысу үшін Қазығұрт ауданына барған. Туысының үйінде отырған жерінде ұялы телефонын қалдырып кетіп, қайта кірген кезде телефоны болмай шыққан. “Самсунг” маркалы телефонын ұрлатып алған жәбірленушіге 100 мың теңге көлемінде шығын келген.
"Аталған жайт Қазығұрт АПБ-мен тіркеліп, ҚР Қылмыстық кодексінің 188-бабы (ұрлық) бойынша енгізілді. Полицейлер ұялы телефонның жеке кодтары бойынша жедел-іздестіру жұмыстары жүргізді. Нәтижесінде екі күн ішінде күдікті анықталып, ұсталды. Ол Қазығұрт ауданының егде жастағы әйел азаматы болып шықты.Тергеу барысында анықталғандай, күдікті ұялы телефонды жасырын алып, кейін сатып жіберген. Ақшасын өз пайдасына жаратқан. Полицейлер жоғалған телефонды айғақты зат ретінде алып, заңды иесіне қайтарды. Қазіргі таңда сотқа дейінгі тергеу амалдары жүргізіліп жатыр" делінген ведомство хабарламасында.
