Төтеше жағдай мерзімі созылса келесі айға төлем автоматты түрде беріледі. Бұл туралы бүгін Орталық коммуникациялар қызметіндегі брифингте ҚР Еңбек және халықты әлеуметтік қорғау министрі Біржан Нұрымбетов айтты.
Еңбек және халықты әлеуметтік қорғау министрі Біржан Нұрымбетовтің айтуынша, төтенше жағдай мерзімі созылуына байланысты мемлекет тарапынан берілетін 42500 теңге көлеміндегі әлеуметтік көмекті төлеу тоқтамайды.
«Тұрғындар арасында "Төтенше жағдай мерзімі созылды, екінші айға созылды ма? Оған тағы өтініш береміз бе?" деген сұрақтар туындап отыр. Мен оларға жауап ретінде айтайын: Жоқ. Сізге бір рет тағайындалып, төленсе болды. Екінші рет өтініш беру қажет емес. Сіз тіркелдіңіз, төлем бердік. Біз сізді білеміз, базада тіркелгенсіздер. Төтенше жағдай мерзімі созылса, келесі айына сізге айтпастан төлей береміз», - деді министр.
Бұдан өзге Біржан Нұрымбетов бұл әлеуметтік төлем ерекше екенін, төтенше жағдай мерзімі тағы жарты айға созылғанымен төлем бір күнге немесе жарты айға деп бөлінбейтінін, әлеуметтік көмек толық көлемде төленетінін атап өтті. Тіпті егер тұрғын 29 сәуір күні өтініш түсірсе, оған 42500 теңге толықтай аударылатынын жеткізді.
Фото: tengrinews.kz
