Оқиға АҚШ-та орын алған. Ерлі-зайыптының отандасқанына биыл 51 жыл толған. Бұл туралы марқұмдардың ұлы Бадди Бейкер өзінің Twitter парақшасында жазды, деп хабарлайды Elitar.kz.
Бадди Бейкердің жазуынша, коронавирустан көз жұмған 74 жастағы әкесі мен 72 жастағы анасы араға алты минут салып бірінен соң бірі жан тәсілім еткен.
"Ата-анамның денсаулығы өте жақсы болатын. Бірақ өткен айда оларда пневмонияның жеңіл түрі анықталып, ауруханаға жеткізілген. Демікпемен (астма) ауыратын әкем ауруханада қалды. Ал анамды дәрігерлер үйге жіберді", - дейді ол.
Бейкердің айтуынша, әкесінен коронавирус анықталған сәтте оны анасынан жасыруға тырысқан. Себебі орынсыз мазаламауды жөн санапты. Алайда профилактика үшін анасын да ауруханаға жатқызған. Араға 45 минут салып әйел азаматынан да қауіпті індет анықталған. Дәрігерлер ерлі-зайыптының екеуінен де COVID-19 вирусы анықталып және жағдайлары ауыр болғандықтан оларға бір бөлмеде ем қабылдауға рұқсат берген.
Айта кетейік, АҚШ коронавирус жұқтыру дерегі бойынша әлемде алғашқы орынға шықты. Бүгінде 335 мыңнан астам қауіпті індетке шалдыққан, оның 9,5 мыңнан астам көз жұмды.
