Жамбыл облысында ертең, 9 сәуірден бастап карантин режимі енгізіледі.
Төтенше жағдай жөніндегі мемлекет комиссияның шұғыл штабының мәліметінше, облыс аумағында және периметрі бойынша 27 бақылау-өткізу бекеті орнатылды, оның ішінде 7-еуі Тараз қаласында қойылған. Онда полиция қызметкерлері, әскери қызметшілер және медицина қызметкерлері жұмыс істейді.
9 сәуір күні сағат 00:00-ден бастап барлық автокөлік құралдарының және азаматтардың Жамбыл облысының аумағына (аумағынан) және облыстың барлық елдімекендеріне (елдімекендерінен) кіру/шығуға тыйым салынады. Карантин кезінде жамбылдықтарға төмендегі әрекеттерді жасауға рұқсат етіледі:
• азық-түлік тауарларын, дәрі-дәрмек және медициналық бұйымдарды сатып алу;
• медициналық көмекке жүгіну;
• 30 минуттан артық емес уақытта үй жануарларын тіркелген тұрғылықты жеріне жақын жерде серуендету;
• мемлекеттік және әлеуметтік көмек алу мақсатында мемлекеттік және өзге де мекемелерге бару;
• күтпеген ТЖ және адамның өмірі мен денсаулығына қауіп төндіретін басқа да жағдайлар кезінде;
• көктемгі егіс және басқа да ауыл шаруашылығы жұмыстарын жүргізу үшін (ауылдық жерлерде).
