Республикалық деңгейдегі «Nomad explorer» экспедициясы Түркістан облысына келді. «Оңтүстік аңыздары» деген тақырыппен өтіп жатқан туристік экспедицияға еліміздің түкпір-түкпірінен келген 700-ге жуық саяхатшы қатысып жатыр, деп хабарлайды Elitar.kzТО әкімінің баспасөз қызметіне сілтеме жасай отырып.
Марғұлан Сейсембаевтың бастамасымен құрылған экспедиция құрамында елге танымал қоғам қайраткерлері, зиялы қауым өкілдері, өлкетанушылар, журналистер, өнер қайраткерлері, кәсіпкерлер мен спортшылар және өзге де сала өкілдері бар.
Алдымен Жамбыл облысының киелі орындарын аралаған саяхатшылар Түркістан облысының да табиғаты мен шежірелі тарихымен танысты.
Бәйдібек ауданындағы Ақмешіт үңгіріне келген қонақтар мұндағы ерекше көрініске сүйсінді. Ғалымдардың зерттеуінше, Ақмешіт үңгіріндегі ауа адамның жүйкесін тыныштандырып, қан қысымын жақсартады. Бойдағы жағымсыз энергияны тартып алады. Белгілі спорт жанашыры, «Қазақстан барысы» жобасының авторы Арман Шораев экспедицияға осы үңгірді көру үшін арнайы келгенін айтты. «Керемет әсер алдым», – дейді ол.
Ал танымал режиссер Ақан Сатаев Түркістан облысында фильм түсіруге сұранып тұрған орындар өте көп екенін, болашақта осы бағытта жұмыс істеуге қарсы емес екенін сөз етті.
Өлкетанушы, «Оңтүстік аңыздары» бағытының авторы Ерлан Сыздықтың айтуынша, саяхатшылардың алған әсерлері керемет. Оларды өлкенің табиғаты мен аңыздары қатты қызықтырған. Егер сұраныс болса, осы бағыт бойынша туристік бағыт жалғасады.
Ақмешіт
үңгіріне аялдаған соң саяхатшылар
Домалақ ана кесенесіне зиярат жасады.
Сондай-ақ Шаяндағы Аппақ Ишан мешітіне
де атбасын бұрып, тарихымен танысты.
Экспедиция
Түркістан облысының туризмін дамытуға
жасалған ұтымды қадамдардың бірі.
