Түркістан облысына арнайы жұмыс сапарымен келген Бақытжан Сағынтаев ең алдымен Арыс қаласында Алматыға берілген секторда жөнделген-қалпына келтірілген жұмыстардың сапасын тексерді.
Естеріңізге салсақ, ағымдағы жылдың 24 маусымында Арыс қаласындағы әскери бөлім аумағындағы оқ-дәрі қоймасында жойқын жарылыс болды. Төтенше жағдай кезде бүкіл қала халқы эвакуацияланды. Арысты қайта қалпына келтіру жұмыстарына еліміздің барлық облысы мен Нұр-Сұлтан, Алматы, Шымкент қалалары жұмылдырылды. Қала 17 секторға бөлініп, қалпына келтіру жұмыстары уақытында басталды. Алматыға № 14 сектор берілді.
Бұл секторда қалпына келтіруді қажет ететін 531 үй анықталды. Оның 503 үйі жөндеуді қажет етті, ал қалған 28 үйді қайта салып шығу қажет болды. Құрылыс жұмыстарына 300-ден астам адам тартылды. Бүгінгі таңда бұл жұмыстар тапсырылды.
