Алматыда 22 жастағы қызды өлтіргендерге сот үкімі шықты. Сотталушылардың бірі 12 жыл, екіншісі 4 жылға бас бостандығынан айырылды, деп хабарлайды Elitar.kz.
«Степанов ҚР ҚК 99-бабы 1-тармағына (Кісі өлтіру) сәйкес кінәлі деп танылып, қауіпсіздігі жоғары мекемеде 12 жылға бас бостандығынан айырылсын. Ал оның сыбайласы Асхат Баржақсин ҚР ҚК 432-бабына (Қылмысты жасыру) сәйкес кінәлі деп танылып, қауіпсіздігі орташа түзету мекемесінде 4 жылға бас бостандығынан айырылсын», - деді судья Мұхидин Тохтахунов.
Одан өзге сотталушылар марқұмның туыстарына 4 миллион теңге көлемінде моральдық шығын өтеп беруі тиіс.
«Бұл адамдар алған жаза мерзіміне қарамастан, өмірінің соңына дейін моральдық тұрғыда қиналатынына сенімдімін. Ол өте ауыр жүк», - дейді қайтыс болған қыздың әкесі Эдуард Галеев.
Естеріңізге салсақ, 22 жастағы бойжеткен Анастасия Галеева ақпан айында жоғалып кеткен болатын. Араға екі ай салып қыздың денесі арықтан табылды.
