Алматыда полицейлер қызметтік көлікпен қағып кеткен әйелдің жағдайы туралы дәрігерлер айтып берді. Ақ халаттылар науқастың жағдайы ауыр деп отыр.
Қалалық Қоғамдық денсаулық басқармасының баспасөз қызметінің мәліметінше, әйел шұғыл медициналық көмек көрсету ауруханасына жеткізілген.
«Пациент жабық ми жарақатымен, миы шайқалып, сол жақ иығы мен жіліншігі сынып түскен. Қазір жансақтау бөлімінде жатыр. Дәрігерлер оның жағдайын тұрақты әрі ауыр деп бағалап отыр», - делінген ведомство мәліметінде.
Еске салсақ, оқыс оқиға бүгін Алматы қаласының Алмалы ауданында орын алды. Қалалық Полиция департаментінің баспасөз қызметіндегілердің айтуынша, әйел азаматы Төле би көшесінің тыйым салынған тұсынан жолды кесіп өтпек болған. Автобустың артынан жүгіріп шыққан оны Төле би көшесімен батысқа қарай келе жатқан полиция көлігі қағып кеткен. Полиция қызметкерлері өздеріне бекітілген әкімшілік аумақта міндетін атқарып жүрген.
Полиция көлігі қағып кеткен әйел азаматы дереу ауруханаға жеткізілді.
