Алматыда бүгін коронавирус індетінен жазылған екі пациент үйлеріне шығарылды. Бұл туралы қалалық қоғамдық денсаулық сақтау басқармасының басшысы Тілеухан Әбілдаев мәлімдеді, деп хабарлайды Elitar.kz.
«31 жастағы ер адам және 30 жастағы әйел бұған дейін коронавирус диагнозы анықталған пациентпен байланыста болған. Екеуі де 13 наурызда Мәскеу-Алматы рейсімен ұшып келген. 31 жастағы жігіттің ауруы жеңіл, ал әйелдің ауруы орташа дәрежеде өтті. Оған оң жақты үстіңгі аймақтың бронх демікпесі деген диагнозы қойылды. Бүгін екі пациенттің де жағдайы жақсарып екеуі де 14 күндік үй карантиніне шығарылды», - деді Тілеухан Әбілдаев.
Айта кетейік, елімізде коронавирустан емделіп шыққандар саны 54 адамға жетті. Оның 29-ы Нұр-Сұлтан қаласында, 23-і Алматы қаласында тіркелген. Ақтөбе мен Солтүстік Қазақстан облыстарында 1 адамнан қауіпті індетті жеңді.
