Әлеуметтік желілерде "Арыста тағы да жарылыс болады екен, тұрғындар түгел эвакуацияланбақ" деген ақпарат тарап кетті. Бұл хабарламаға қатысты қала әкімдігі ресми мәлімдеме жасады.
"Әлеуметтік желілерде: «Ағымдағы жылдың 20 қыркүйек күні Арыс қаласында жарылыс болады, осыған сәйкес эвакуация жұмыстары жүргізіледі" деген жалған ақпарат таратылуда.
Халық арасында жалған ақпарат таратушылар, Қазақстан Республикасының 2014 жылғы 3 шілдедегі №226-V Қылмыстық Кодексінің 274-бабы «Көрінеу жалған ақпарат тарату» тармағы бойынша жауапкершілікке тартылуы мүмкін екендігін хабарлаймыз.
Жалған мәліметке сенбей, сабырлық танытуларыңызды сұраймыз!" делінген әкімдіктің хабарламасында.
Еске салсақ, ағымдағы жылдың 24 маусымында Арыстағы әскери бөлім аумағындағы оқ-дәрі қоймасында жойқын жарылыс орын алып, күллі қала халқы қауіпсіз аймаққа шығарылды. Осыдан соң билік арыстықтарды сабырға шақырып, жарылыстан зақым келген үйлер мен нысандар бір айда толықтай жөнделетінін мәлімдеді. Қазіргі таңда қаланы қалыпқа келтіру жұмыстары әлі де жалғасып жатыр.
