Полицейлерге Арыс аудандық балалар үйінің қызметкерлері хабарласып, 14 жастағы тәрбиеленушінің жоғалып кеткендігін айтқан. Баланың жоғалған уақыты сағат шамамен 16:00 болғанымен, тәрбиешілер өздіктерінен іздеуге кірісіп, біршама уақытты өткізіп алған. Нәтиже болмаған соң, кешкі сағат 18:00-дер шамасында полицейлердің көмегіне жүгініпті. Хабарлама түсе салысымен полицейлер кәмелетке толмаған ер баланы тездетіп табуға кіріседі.
Түркістан облыстық полиция департаментінің баспасөз қызметінің хабарлауынша, тәртіп сақшылары Арыстағы қоғамдық орындардың барлығын тексеріп шығады. Бірақ нәтиже болмайды. Кейін облысқа қарасты барлық қала, аудандарға баланың жоғалуы бойынша хабарлап, іздестіру жұмыстарын күшейтеді. Сонымен қатар, жоғалған баланың жақындары туралы мәліметтерді алып, олардан сұрастыру жұмыстарын жүргізеді.
"Жоғалған жасөспірім шамамен түнгі сағат 01:00-лерде 136 шақырым жердегі Сарыағаш ауданынан, яғни, аудан көшелерінің бірінде орналасқан жеңіл тағамдарды дайындайтын дүңгіршектің жанынан табылды. Полицейлер баланы полиция бөлімшесіне жеткізіп, денсаулығының жақсы екендігіне көз жеткізіп, психолог мамандарды шақырып, түсіндіру жұмыстарын жүргізеді. Оған қоса, тәрбиешіні де шақыры,п баланы дін аман табыстайды. Тәртіп сақшыларының айтуы бойынша, жасөспірімнің жоғалып кетуіне сыныптасы екеуінің араздасып қалуы себеп болған.
