Асқар Мамин Арыс қаласына келіп, жарылыстан зақым келген нысандар құрылысының жұмысымен танысты, деп хабарлайды Elitar.kz тілшісі.
Үкімет басшысының ат басын бұрған алғашқы нысан әскери бөлімге жақын аумақта орналасқан «Көктем» шағымауданындағы үш қабатты тұрғын үйлер болды. Мұнда жойқын жарылыстан үйдің шатырлары мен терезелеріне, есіктер ме қабырғаларына зақым келген. Тұрғындардың айтуынша, бұл маңға үш снаряд түскен. Қазіргі таңда тұрғын үйді қалпына келтіру жұмыстарын Павлодар облысы жүргізіп жатыр.
«Алтын тұмар» балабақшасының құрылысын да аталған облыс жүргізуде.
Бұдан өзге ҚР Премьер-министр өзге де секторлардағы бес қабатты тұрғын үйлер мен жер үйлердің және тағы да басқа нысандардың құрылыс басына барды.
Сонымен қатар Арыс аудандық орталық ауруханасын аралап көріп, Халыққа қызмет көрсету орталығының қазіргі жұмысымен де танысты. Айта кетерлігі, ХҚКО қарсы бетте орналасқан жер үйге снаряд түсіп, үй алдындағы дүкен мен үш автокөлік өртеніп кеткен. Қазіргі таңда өртенген үй мен дүкен толықтай сүріліп, жаңадан бой көтеруде. Ол жұмыстарды Шығыс Қазақстан облысы жүргізуде.
Іссапар барысында Асқар Мамин тұрғындарға құрылыс жұмыстары бір ай ішінде бітенінін уәде етіп, ол жұмыстарды апта сайын келіп тексеріп тұратынын жеткізді.
