21 ақпан, 16:15
Индустрия және инфрақұрылымдық даму министрлігінің кеңейтілген алқа отырысында Премьер-министрдің бірінші орынбасары Асқар Мамин бәсекелестік заманда отандық өндірушілерді қолдауға шақырды, деп жазады BNews.kz. Ол үйлеспейтін үлгі ретінде шетелде демалып қайтқан кейбір мемлекеттік қызметкерлердің талғамы өзгеретіні туралы айтып берді.
«Бізге көптеген фактілер белгілі болуда. Мысалы, облыс әкімінің орынбасарларының бірі Түркияда демалып қайтқан соң түрік автобустарын сатып алу туралы келіссіздерді бастайды. Ал көрші облыста, 200 шақырым жерде отандық өндірістің автобустары шығарылуда, олар бәсекеге әлдеқайда қабілетті. Мұнан шығар қорытынды айқын. Меніңше, аймақтардағы әріптестер мұндай мәселелерге асқан жауапкершілікпен қарауы тиіс», - деді Асқар Мамин.
Жалпы, индустрия және инфрақұрылымдық даму бірінші вице-министрі Роман Склярдың айтуынша, автокөлікпен жолаушыларды тасымалдау саласында былтырғы шілде айынан бері автобус тасымалын дамытудың 2018-2020 жылдарға арналған Кешенді бағдарламасы жүзеге асырылуда.
«Бағдарламада үш негізгі бағытты – автобус паркін жаңарту жұмыстары, тарифтерді реттеу және тасымалдаушылардың шығындарын субсидиялау және жолаушылар тасымалдау саласындағы қазіргі нормативтік құқықтық базаны жетілдіру бағыттарын қамтиды. Автобус паркін жаңарту аясында жеңілдік лизингі ұсынылып, оған 10 млрд теңге бөлінген және «БРК-Лизинг» АҚ 10 млрд теңге коммерциялық лизинг ұсынылды. Соның нәтижесінде Шымкент, Семей және Атырау қалаларында жалпы құны 16,45 млрд теңгеге келісім-шарттар түзілді», - деді Скляр.
Вице-министрдің айтуынша, бұған қоса, Астана, Алматы, Ақтау және Павлодар қалаларын да қаржыландыру шарттары қарастырылуда.
ФОТО: Экспресс К
