Түркістан облысына жасаған жұмыс сапары кезінде бірқатар құрылыс нысандарын аралаған Үкімет басшысы жұмыстардың үздіксіз жүргізілуі тиіс екенін атап айтты. «Күшейтілген жұмыс режимін енгіземіз» деген ол екі апта ішінде құрылыс жұмыстарын тәулік бойғы режимге көшіру керектігін тапсырды. Тіпті Түркістанға жасайтын келесі сапарында бұл тапсырманың орындалып жатқанына көз жеткізу мақсатында құрылыс басына түнгі уақытта баратынын жеткізді.
Айта кетейік, бүгін ҚР Үкімет басшысы Асқар Мамин Түркістанға ресми сапармен келді.
Жиырмаға жуық құрылыс нысандарының жұмысымен танысқан Премьер-министрге Түрікстан қаласы айналасынан құрылатын жасыл белдеу мен Арыс-Түркістан каналы туралы мәлімет берілді. Бұл жұмыс жоспары туралы Асқар Маминге Түркістан облыстық ауыл шаруашылығы басқармасының басшысы Нұрбек Бадырақов егжей-тегжейлі түсіндіріп берді.
Үкімет басшысының жұмыс сапары әкімдік ғимаратында өткен жиынмен қорытындыланды. Онда облыс әкімі Өмірзақ Шөкеев баяндама жасап, құрылысы кешеуілдеп жатқан және әлі басталмаған нысандарды тізіп шықты. Тіпті кейбір мәселелер бойынша Премьер-министрден қолдау сұрады.
